شعر

علمتيني أكون إنسان

بقلم..سارة صالح

يابنات تعالوا بسرعة شوفوا حصل إيه!
لزميلنا محمد وجراله إيه !
قولي ياسلوى جراله إيه!!
ليل نهار يحكي حواديت
عن بطولاته وإنه شديد
حتى سمى نفسه كمان
قال إيه الواد باتمان
طب عارفين محمود الشاطر
إبن الناظر حصله إيه!!
كان عامل واجبه تمام
راح محمد من ورا ضهره
سرق كتابه و كراسته
قطع الواجب وبقى فرحان
ونقله في كتابه كمان
جت الميس سألت سؤال
عن الواجب مين حله باتقان
راح محمود رافع إيده
حاول يطلع الكشكول،
لقى الواجب مش محلول
قعد يبكي ويصرخ ويقول
انا طول الليل ياميس سهران
بحل الواجب باستمرار
الميس قالت مين تاني ياولاد
رفع محمد إيده قوام
قال للميس حليته تمام
خلت كل الفصل يسقف
لمحمد السوبر مان
فجأة قالتله قوم يامحمد
ع السبورة ،
حل الواجب وليك هدية مضمونه
محمد وشه ضرب ألوان ،
إيده اترعشت وفقد الاتزان ،
مش عارف ينطق بكلمه ،
ولا حتى يكتب جملة ،
لما الميس سألته في إيه!!
قعد يبكي وصعبت نفسه عليه،
قال للميس أنا غلطان
كان نفسي أكون سوبر مان
ولد شجاع وشاطر كمان ،
الميس قالتله يامحمد
المسلم لايكذب أبدا
ولا ياخد شيء مش من حقه ،
ولا يظلم في يوم صاحبه ،
مش مهم تكون سوبر مان
المهم تكون رجل صدوق ليك أمان
يالا اعتذر لصاحبك محمود
وقوله للكذب أنا مش راح أعود
راح محمد قال أنا آسف ،
عمري ماهكذب تاني خلاص ،
سامحوني كلكوا كمان ،
شكرا ليكي ياميس إحسان
علمتيني أكون إنسان .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً

إغلاق
إغلاق